Էկոնոմիկայի նախարար Վահան Քերոբյանը Ազգային ժողովում անդրադարձավ Հայաստանի և ԵԱՏՄ անդամ երկրների միջև ենթակառուցվածքային կապին։ Նրա խոսքով արդեն կա գործողությունների ծրագիր։
«Եվ այստեղ մենք ունենք գործողությունների պլան, որի առաջին քայլն, իհարկե, Հայաստանի երկաթուղային համակարգը միացնելն է ԵԱՏՄ երկաթուղային համակարգին։ Դեռևս այս տարվա սկզբից բավական սերտ քննարկումներ ենք ունեցել թե ռուսական, թե եվրոպական բեռնափոխադրող ընկերությունների հետ։ Եվ հենց հիմա արդեն նախագիծը պատրաստ է, որ պետք է ներկայացնենք կառավարության քննարկմանը, որպեսզի կարողանանք կանոնավոր լաստանավային հաղորդակցություն ունենալ Փոթիի և Պորտ Կավկազի միջև, որը թույլ կտա, որ մեր երկաթուղային համակարգը միանա եվրասիական երկաթուղայի համակարգին։ Դա մեզ թույլ կտա, որ մեր տնտեսության մրցունակությունն ավելացնենք, լավացնել մեր լոգիստիկ հնարավորությունները ոչ միան Ռուսաստանի, այլ նաև Բելառուսի և Ղազախստանի հետ»,- ասաց Վահան Քերոբյանը։
Քերոբյանի խոսքով, եթե նախագիծն արժանանա գործընկերների հավանությանը, ապա դեկտեմբերի 1-ից կանոնավոր լաստանավային հաղորդակցություն կունենանք։
