2022թ. Նիկոլ Փաշինյանը ԼՂ հարցով երկու սկզբունքային հայտարարություն է արել: Այս մասին «Ֆեյսբուքում» գրել է Արցախի խորհրդարանի նախկին պատգամավոր, արտաքին հարաբերությունների հանձնաժողովի նախկին նախագահ Վահրամ Աթանեսյանը։
«Առաջինը կարգավիճակի հարցում նշաձողն իջեցնելու մասին էր եւ եթե ճիշտ եմ հիշում՝ արվել է ապրիլին: Երկրորդը հնչեցվել է Պրահայի քառակողմ հանդիպումից հետո եւ վերաբերվում էր ԼՂ-ում եւ նրա շուրջ ապառազմականացման հնարավորությանը: Երկու գաղափարն էլ պաշտոնական Ստեփանակերտի կողմից մերժվել է: Նայեք արխիվները, կգտնեք Արցախի ԱԺ Հայտարարությունը, որտեղ անընդունելի է համարվում անկախությունից ցածր որեւէ կարգավիճակ: Երկրորդի պատասխանը տվել է Արցախի ԱԽ-ն՝ հայտարարելով, որ Պաշտպանության բանակը պետք է արդիականացվի եւ վերածվի ռազմավարական նշանակության խնդիրներ լուծելու ունակ զորամիավորման: Այսօր ոմանք եւ որոշներ լծվել են Արցախի ռազմա-քաղաքական ղեկավարությանը նույնիսկ պատմական պատասխանատվությունից ապահովագրելու շատ ,,շնորհակալ,, գործին, իսկ ով հակառակ մոտեցում ունի, պիտակավորվում են որպես Փաշինյանի վկաներ, նրա դեմքը փրկողներ: Թող ամեն մարդ զբաղվի իր դեմքը փրկելու գործով: Ակնարկներ անել պետք չէ: Միայն ասեմ, որ ավելի բարոյական է, երբ մարդ հասկանում է վրիպումը, սխալը եւ կանգնում ռացիոնալ դիրքում, քան՝ երբ նա կարիերան սկսում է որպես երդվյալ լեւոնական, բայց հետո վերածվում կատաղի հակալեւոնականների քարոզչա-քաջամարտիկի: Առայժմ այսքանը»,- գրել է Աթանեսյանը: