Չկա այլ եղանակ՝ կայուն և ժողովրդավար հասարակություն կառուցելու ճանապարհին, քան իրավունքի գերակայության երաշխավորումն ու իրավունքների պաշտպանության հասանելի կառուցակարգերի ձևավորումը. տեղի է ունեցել ՄԻՊ աշխատակազմի Լոռու մարզային ստորաբաժանման բացման հանդիսավոր արարողությունը։
Մարդու իրավունքների պաշտպանի հաստատությունը համալրվել է մարզային ևս մեկ ստորաբաժանումով: Այսօր՝ հուլիսի 4-ին, Վանաձոր քաղաքում տեղի է ունեցել ՄԻՊ աշխատակազմի Լոռու մարզային ստորաբաժանման բացման հանդիսավոր արարողությունը:
Այն գտնվում է Վանաձոր քաղաքի կենտրոնական հատվածում՝ Տիգրան Մեծ 24/3 հասցեում: Աշխատելու է շաբաթական 5 օր, սակայն մարզի բնակիչների խնդիրները լուծելու է շուրջօրյա գրաֆիկով:
Հանդիսավոր արարողությանը մասնակցել և բացման խոսքով հանդես են եկել Մարդու իրավունքների պաշտպան Անահիտ Մանասյանը, Հայաստանում ԵՄ պատվիրակության ղեկավար, դեսպան Անդրեա Վիկտորինը, ՄԱԶԾ մշտական ներկայացուցիչ Նաթիա Նացվիլիշվիլին և Լոռու մարզպետ Արամ Խաչատրյանը:
Բացման արարողությանը ներկա են եղել նաև միջազգային կառույցների, պետական տարբեր գերատեսչությունների և քաղաքացիական հասարակության ներկայացուցիչներ:
Ողջունելով հյուրերին՝ Պաշտպանը նշել է, որ մարզային ստորաբաժանման բացումը ևս մեկ նշանակալի քայլ է մարդու իրավունքների խթանման և պաշտպանության ուղղությամբ: Այս համատեքստում նա հատուկ ընդգծել է, որ մարդու իրավունքների պաշտպանությունը Հայաստանի Հանրապետության բոլոր բնակավայրերում պետք է հասանելի և մատչելի լինի:
«Շիրակ, Սյունիք, Տավուշ, Գեղարքունիք, իսկ այսօր արդեն Լոռի. հպարտությամբ պետք է նշեմ, որ Պաշտպանի հաստատության տարածքային ընդգրկվածությունը ընդլայնվում է: Այս ստորաբաժանումը կարևոր դերակատարում կունենա մարդու իրավունքների պաշտպանության տեսանկյունից: Ցանկանում եմ շնորհակալություն հայտնել մեր միջազգային գործընկերներին, մասնավորապես՝ մեծարգո տիկին Անդրեա Վիկտորինին, Նաթիա Նացվիլիշվիլիին, ովքեր մեծ նվիրումով աջակցել են ՄԻՊ հաստատությանը` տարբեր ծրագրերի շրջանակում: Նաև շնորհակալություն եմ հայտնում մարզպետ պարոն Արամ Խաչատրյանին՝ ստորբաժանման բացման արարողությանը մասնակցելու համար»,- ասել է Պաշտպանը:
Միևնույն ժամանակ Պաշտպանը հատուկ ընդգծել է, որ մարզային ստորաբաժանումների առկայությունը ինքնանպատակ չէ և պատշաճ աշխատանքի պարագայում կարևոր երաշխիք է մարդու իրավունքներիառավել արդյունավետ պաշտպանության իրականացման տեսանկյունից: Անահիտ Մանասյանը հատուկ ընդգծել է, որ չկա այլ եղանակ կայուն և ժողովրդավար հասարակություն կառուցելու ճանապարհին, քան իրավունքի գերակայության երաշխավորումն ու իրավունքների պաշտպանության հասանելի կառուցակարգերի ձևավորումը:
Անդրեա Վիկտորինը և Նաթիա Նացվիլիշվիլին շնորհավորել են ստորաբաժանման բացման առթիվ՝ նշելով մարզերում մարդու իրավունքների պաշտպանության ոլորտի զարգացման կարևորությունը:
Իր հերթին ստորաբաժանման պատասխանատու Տիգրան Մադաթյանը ներկայացրել է մարզում մարդու իրավունքների պաշտպանության վիճակը, արձանագրված խնդիրները, ինչպես նաև իրականացվելիք աշխատանքների տեսլականն ու ուղղությունները: Նա վստահեցրել է, որ ջանք ու եռանդ չեն խնայելու մարզի բնակչության իրավունքների պաշտպանության առաքելության իրականացման ուղղությամբ:
ՄԻՊ աշխատակազմի Լոռու մարզային ստորաբաժանման բացումը իրականացվել է «Հաշվետու հաստատություններ և մարդու իրավունքների պաշտպանությունը Հայաստանում» ծրագրի աջակցությամբ։ Ծրագիրը ֆինանսավորվում է Եվրոպական միության կողմից և իրականացվում ՄԱԶԾ-ի, ՅՈՒՆԻՍԵՖ-ի, ՄԱԿ-ի Բնակչության հիմնադրամի և ԵԱՀԿ-ի կողմից։
