«Հայաստան» դաշինքում դեռ վերջնական որոշում չկա մանդատները վերցնելու կամ չվերցնելու առումով։ Այս մասին այսօր հայտարարել է ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը։
«Երեկ քննարկման ժամանակ Սեյրան Օհանյանը մի համեմատություն արեց, ասաց, որ մարտական գործողությունների ժամանակ, եթե ամբողջական խնդիրը չի լուծվում, բայց դու վերցնում ես ինչ-որ խրամատներ, ապա պետք է անպայման այդ խրամատները ոչ թե պահես, այլ նաև ամրացնես հետագա գրոհի համար։ Հիմա պատերազմ չի, բայց քաղաքական պայքար է և այդ համեմատությունը միգուցե ավելի մեղմ տերմիններով կարելի է կիրառել այս պարագայում։
Համարում եմ, որ մենք ստացել ենք մեր պայքարը շարունակելու համար շատ լուրջ, նոր հնարավորություններ», – ասաց Ռոբերտ Քոչարյանը։
Նրա խոսքով՝ տրամադրված են շարունակելու պայքարը և խորհրդարանական պայքարը միայն կարող է ուժեղացնել, այլ ոչ թե փոխարինելու է փողոցային պայքարին։
«Մենք ունենք նաև փողոցային պայքարի մեծ փորձ և կարծում եմ, որ այդ համատեղումը միայն ուժեղացնում է մեր հնարավորությունները», – ասաց Քոչարյանը։
Անդրադառնալով իշխանության երեկվա հանրահավաքին հնչած ելույթներին Ռոբերտ Քոչարյանն ասաց, որ տպավորություն ունի, որ ոչինչ չի փոխվել։
«Ոչինչ չի փոխվելու, իրենք ընկալել են այս քվեները որպես վստահություն հենց իրենց։ Իրենք ընկալել են, որ ժողովուրդը ուզում է, որ իրենք շարունակեն այն ոճով, որով շարունակել են։ Մինչդեռ, իմ տպավորությամբ ուրիշ բան է կատարվել այս ընտրական գործընթացում։ Եթե իրենք շարունակեն նույն ոճով, նույն վենդետաներով, ներքաղաքական լարվածությունը շարունակելով, ապա ես որևէ կասկած չունեմ, որ Հայաստանը կանգնած է լինելու ևս մեկ արտահերթ ընտրությունների առջև»,- ասաց Քոչարյանը։
Երկրորդ նախագահն անդրադարձավ նաեւ Նիկոլ Փաշինյանի ընդդիմադիր ուժերի հետ երկխոսություն սկսելու եւ հաշտության ձեռք մեկնելու հայտարարություններին։
«Առաջինն, այս իշխանությունն այնքան է ստել, որ հավատալ ուղղակի հնարավոր չէ։ Ես կարծում եմ՝ սա ոճ է՝ դիտորդներին կամ ինչ-որ մեկին ինչ-որ բան ցույց տալու համար։ Եթե իրենք իսկապես նման տրամադրություններ ունեն, ապա առնվազն մի 6 ամիս իրենց պետք է պահեն այդ ոճով, որ գոնե մի քիչ հավատ ներշնչեն, որ դա իրենց իրական ցանկությունն է։ Չեմ կարող հավատալ, երբ մեր հայտնի բժիշկ Արմեն Չարխչյանին ուզում են տանել կալանքի՝ ուղղակի մի անհեթեթ մեղադրանքով։ Իրենք հնարավորություն են ունեցել 2018 թվին լրիվ այլ զարգացման ուղղություն տալ Հայաստանին։ Ես եկել եմ Հայաստան, հաջորդ օրն ինձ կալանավորել են։ Եվ զանգվածային հետապնդումներ են սկսվել բոլոր նրանց դեմ, ովքեր, իրենց կարծիքով, ունեն որոշակի հեղինակություն, ռեսուրս, անցած ճանապարհ, ազդեցություն։ Ես պայքարելու եմ, և այդ պայքարի համար մենք ստացել ենք լրացուցիչ լծակներ, հնարավորություններ»,- ասաց Քոչարյանը։
